ريم نصر الدين تُطالب بقوانين مُنظمة لتبني الأطفال مجهولي النسب

ريم نصر الدين تُطالب بقوانين مُنظمة لتبني الأطفال مجهولي النسب

مدى بوست_فريق التحرير

طالبت الفنانة السورية الشابة ريم نصر الدين بإصدار قانون يخص الأطفال مجهولي النسب الذين يُلقون على أعتاب المساجد أو المستشفيات أو البيوت في الآونة الأخيرة.

وطرحت نصر الدين التبني كحلٍ لهؤلاء الأطفال حتى يتربوا في بيئة صحية عوضًا عن الحياة في الشارع أو في ملجئ للأيتام يفتقد للحب والحنان، كما طالبت بأن يُوضع قانون يُنظم مسألة التبني ويحمي حقوق الطفل والعائلة المتبنية.

ورفضت نصر الدين تحريم البعض لأمر التبني، مشيرةً إلى أن الحرام هو ترك هؤلاء الأطفال في الشارع أو أن يُجبر الفقر بعض الآباء على التخلي عن أبنائهم برميهم في الطرقات.

تدوينة ريم نصر الدين

كتبت الفنانة ريم نصر الدين عن تنظيم مسألة تبني الأطفال مجهولي النسب: “كلّ يوم عم نصحى على خبر.. أهل تركوا ولادهم على باب بيت أو مشفى أو جامع، بتمنى إنه يصدر قانون يخص هدول الأطفال وبتمنى نصير نقدر ندافع عن (التبني) بشكل قانوني”.

وأضافت: “لأنه إذا التبني حرام، ما بتخيل إنه ينترك كوام لحم بالشوارع هو حلال! ويلي بيقول التبني حرام يا ريت للحظة يتخيل بعيد الشر إنه عنده ابن رضيع ضاع مثلاً، هل يا ترى بيتمنى انه يربى بالشارع!.. إذا فقد الأمل إنه يلاقيه، بيتمنى يا ترى إنه يضل بالميتم! أو بيتمنى ترعاه عيلة ولاد حلال ويحس إنه عنده عيلة ؟!”.

وتابعت: “في كتير ناس بتتمنى لو الله طعمها ولاد، يا ريت نقدر نفيد كل الأطراف بقانون يحمي الجميع، التبني مو حرام، الحرام هو طفل ينترك بالشارع والحرام هو أب ما قادر يصرف على ولاده والحرام هو الظلم والجوع والحاجة والتخلف!، أمّا التبني..”.

واستطردت: “معلش هلأ بده يطلعلي مجموعة من دار افتاء مواقع التواصل الاجتماعي يلي كل واحد فيهم قاعد عم يأركل وفاتح فيس بوك ويبلش ينظر بالدين!.. التبني بيحلّ قضيّة والتبني في شروط وقانون صارم بيحمي الطفل وبيحمي أهله (يلي اتبنوه).. هاد يلي لازم ندعمه وأكيد ندعم كل طفل عديم الحيلة وما بيقدر يدافع عن حقه إنه يعيش حياة كريمة”.

واختتمت تدوينتها، فكتبت: “بتمنى تتقبلوا وجهة نظري.. بس هاد العـ.ـنف الفكري والأسري غير مقبول لا بالشرع ولا بالدين ولا بالمنطق ولا بالإنسانية”.

ردود أفعال

تفاعل عدد كبير من المتابعين مع طرح الفنانة ريم نصر الدين عن التبني، فكتبت إحداهن: “حياتي انتي فهمانة الموضوع غلط.. التبني مو حرام بس إنك تسجلي الولد ع نسب غير نسب أبوه هاد الحرام”.

وكتبت أخرى: “التبني مو حرام بالإسلام، الحرام إنه يتسمى الطفل المتبنى على اسم أب مو أبوه ولكن اللي بيحتضن أو بيكفل يتيم أجره كبير وحتى لو ما كان يتيم طبعًا”.

وأوضحت متابعة الفرق ما بين التبني والكفالة، فكتبت: “عفوًا بس يعني مع احترامي لوجهة نظرك بس إذا رسول الله عليه الصلاة والسلام قال لا تبني في الإسلام وفي من الكلام حكمة وبكلامك هاد انت كأنك عم تقولي كلام الرسول (ص) حرام”.

وأضافت: “بقدر تعاطفك واندفاعك للموضوع بس مو كمان تحكي كلام ما بينقبل وممكن تتهاجمي عليه من كتيرين، يعني فيكِ ترعي طفل وتكوني مسؤولة عنه ماديًا ومعنويًا بصيغة ما بدون ما تتبنيه وتسجليه على اسمك وتخالفي الشرع والدين وقول الرسول عليه الصلاة والسلام”.